Re bomang
Lekgotla la Phadišano ke mokgatlo wo o ikemetšego wa kahlolo wo o hlomilwego go ya ka karolo ya 26 ya Molao wa Phadišano, No. 89 wa 1998 (Molao). E na le matla a taolo go ralala le Repabliki ya Afrika Borwa. E phethagatša mešomo ya yona go ya ka Molao, Molaotheo le ntle le poifo, go amogelwa goba kgethollo.
Lekgotla la Phadišano ke le lengwe la balaodi ba bararo bao ba ikemetšego bao ba hlomilwego go ya ka Molao. Tše ke:
- Khomišene ya Phadišano, yeo e lego bolaodi bja dinyakišišo le phethagatšo
- Lekgotla la Phadišano, leo le ahlolago merero yeo e rometšwego go lona ke Khomišene ya Phadišano, le
- Kgorotsheko ya Boipiletšo ya Phadišano, yeo e lebelelago boipiletšo goba ditshekatsheko kgahlanong le diphetho tša Lekgotla.
Ke ka baka la’ng re ile ra hlongwa
Pele ga Molao, phadišano ka ekonoming e be e hlokometšwe ke Boto ya Phadišano yeo e sa ikemego, yeo e eleditšego Tona ya Kgwebišano le Intasteri.
Ka morago ga 1994, go rarolla go se lekalekane ga nakong ye e fetilego le go netefatša phihlelelo ya ekonomi e bile selo seo se tlago pele.
Mmušo wo mofsa wa temokrasi o be o ikemišeditše go mpshafatša melao ya phadišano, bjalo ka ge go boletšwe ka go Pampiri ye Tšhweu ya Kagoleswa le Tlhabollo. Ka 1998, Molao wa Phadišano, No. 89 wa 1998, o ile wa tšeela Boto ya Phadišano legato ka mekgatlo ye meraro ye e ikemetšego: Khomišene ya Phadišano, Lekgotla la Phadišano le Kgorotsheko ya Boipiletšo ya Phadišano. E ile ya laela gape difeme go tsebiša mekgatlo ye ka ga kopanyo le go hwetša dithoto ka godimo ga moedi wo o itšego.
Seo re se dirago
Molao wa Phadišano o laola mafelo a mabedi a nabilego a phadišano:
- dikopano le ditheko, le
- mekgwa ye e ileditšwego (boitshwaro bja go lwantšha phadišano).
Ditabeng ka moka, Lekgotla la Phadišano le tla swara ditheeletšo tšeo di buletšwego setšhaba. Mo e nyakilego go ba maemong ka moka, ka ntle le melato ye mmalwa ya mohuta wa tshepedišo, maloko a mararo a Lekgotla a swanetše go theeletša molato gomme a tšee sephetho. Lekgotla la Phadišano le swanetše go:
- go fa ditokollo, go dumelela goba go thibela dikopano tše kgolo (ka goba ntle le maemo) goba go thibela kopanyo
- go ahlola mabapi le boitshwaro bjo bongwe le bjo bongwe bjo bo ileditšwego go ya ka kgaolo ya 2 goba 3 ya Molao, le
- go fa taelo ya ditshenyagalelo go ya ka karolo ya 57 ya Molao ka ga merero yeo e e tšweleditšwego ke Khomišene ya Phadišano.
Ge Lekgotla la Phadišano le fihlile sephetho, le swanetše go phatlalatša mabaka a lona lefelong leo.
